UKARABATI WAPAMBA MOTO UWANJA WA CCM KIRUMBA JIJINI MWANZA

Judith Ferdinand, Mwanza

Uwanja wa Michezo wa CCM Kirumba jijini hapa unaendelea kufanyiwa ukarabati katika maeneo mbalimbali, ili kukidhi hadhi ya kimataifa.

Hayo yalisemwa jana na Katibu wa Chama Cha Mapinduzi(CCM),mkoa wa Mwanza Raymond Mwangwala, wakati akizungumza na Majira ofisini kwake mkoani hapa.

Mwangwala alisema, ukarabati huo umefanyika katika maeneo ya msingi ikiwa ni  pamoja na upandaji nyasi  katikati ya uwanja(Pitch) ambazo zimegharimu shilingi 711000 na kuzibua mifereji ya kupitisha maji machafu iliyokuwa imeziba ndani ya  uwanja.

Pia wamefanya marekebisho ya magoli kwa kuongeza ukubwa kama walivyokua wameelekezwa  pamoja na kukarabati vyoo sita ambavyo vimekua na hadhi ya kimataifa ambapo viongozi wa TFF wameisha vikagua na kuridhishwa navyo.

Hata hivyo alisema,mpaka kufikia tarehe 15 July mwaka huu,katika mechi ya kirafiki kati ya Rwanda na Tanzania, watakua wameishakamilisha kufanya marekebisho katika maeneo ya msingi.

Aidha alisema,marekebisho mengine yataendelea kabla ya ligi kuu kuanza,pia wanatarajia kuongeza taa,ili waweze kupata mechi za usiku sambamba na kuweka runinga(Television) sehemu mbalimbali ndani ya uwanja kwa ajili ya mashabiki walio mbali waweze kufuatilia kwa ukaribu michezo inavyoendelea.

Na wakati huohuo Mwangwala aliwaomba wakazi wa Mwanza na mikoa jirani kujitokeza kushuhudia na kushangilia timu ya taifa katika mchezo wa kirafiki unaotarajiwa kutimua vumbi mapema July 15 katika uwanja wa CCM Kirumba kati ya  timu ya  taifa ya Rwanda na Taifa Stars.

Vilevile  alisema, wanataka kuutangaza uwanja  huo pamoja na mkoa wa Mwanza na kuufanya kuwa kituo cha michezo katika nchi za Afrika Mashariki.