MWEKEZAJI AWAPATIA MAJI WANANCHI.

Mashine ya kuchimba visima virefu ikiwa inatoa maji.

Wananchi wa kijiji cha Nduha na Mwamlapa wakiwa katika eneo la kisima cha maji.

Diwani wa kata ya Kasoli Mayala Nshiminzi akimwonyesha namna maji meneja wa kiwanda Boaz Ogolla yalivyopatikana wakati wa zoezi la uchimbaji wa kisima hicho kijiji cha Mwamlapa.

Na COSTANTINE MATHIAS, Simiyu.

WANANCHI na wakazi wa vijiji vya Mwamlapa na Nduha kata ya Kasoli wilayani Bariadi mkoani Simiyu wamenufaika na mradi wa maji wa kisima kirefu kilichochimbwa na mwekezaji wa kiwanda cha kuchambua pamba  cha Alliance Ginnery kwa lengo la kusogeza huduma hiyo kwa jamii.

Akizungumza jana wakati wa zoezi la uchimbaji wa kisima hicho likindelea, Meneja wa kiwanda hicho Boaz Ogola alisema kuwa kisima hicho kitaghalimu kiasi cha milioni 30 ambapo maji watayatoa kwenye kisima na kupeleka katika kijiji hicho pamoja na kijiji cha Ndilu.

Ogola alisema kuwa katika mradi hiyo pamoja na mingine vitachimbwa katika kata hiyo ambapo visima vitano vitaghalimu kiasi cha milioni 200 lengo likiwa ni kusogeza huduma za kijamii .

“katika bajeti yetu tutenga milioni 200 kwa ajili ya kuchimba visima virefu katika kata hiyo na wananchi tumeshawashirikisha na wameitikia kwani visima hivyo vitasaidia jamii kufanya shughuli za kimaendeleo kwa kiasi kikubwa tofauti na sasa hasa wakinamama muda mwingi wanahangaika kuchota maji”alisema Ogola.

Alibainisha kuwa wao kama wawekezaji watahakikisha jamii wanayoishi nayo wanaisaidia katika miradi mbalimbali ya maendeleo kwani bila wananchi kujishughulisha hata uwepo wa kiwanda hicho ni sawa na bure na kwamba hakiwezi kufanya shughuli ya uzalishaji.

Kwa upande wake diwani wa kata hiyo Mayala Lucas alisema kuwa hali ya ukosefu wa maji katika kijiji hicho ulikuwa mkubwa na kwamba walikuwa wanalazimika kufuata maji mbali na kijiji hicho.

Mayala alisema kuwa baada ya kupata mradio huo kutoka kwa mwekezaji kijiji kilikaa na kujadiliana jinsi ya kupata eneo la kuchimba kisima ambapo wananchi walikubali kuachia maeno ili wataalamu wa maji wapime sehemu ambayo wanaweza kupata maji hayo.

Aidha alisema kuwa kuwepo kwa mradi huo utanufaisha  wakazi 5000 wa vijiji viwili vya Mwamlapa na Ndilu na kuachana na changamoto ya maji ya mda mrefu katika vijiji hivyo kwani maji hayo yatavutwa kwa umeme kuelekea katika sehemu husika ya kuchotea maji.

Alisema katika kushirikiana na serikali Halmashauri ya wilaya ya Bariadi vijijini wanao mpango wa kuvuta maji kutoka katika visima hivyo kusambaza katika vitongoji vyake kwani mwekezaji atavuta kuelekea kwenye senta ambapo kutakuwa na kituo kikubwa cha kuchota maji.

Maria John ambaye ni mkazi wa kijiji hicho alisema kuwa kuwepo kwa mradi wa kisima hicho utawapunguzia adha ya maji iliyokuwepo awali kwani walikuwa wakilazimika kufuata maji umbali wa kilomita 3 hadi 4.

Alibainisha kuwa endapo mradi huo ukitunzwa kikamilifu wananchi watanuika hivyo amewataka wananchi wa kijiji hicho kutoa ushirikiano kwa mwekezaji huyo ili aendelee kusaidia katika miradi mingine.