JUKWAA LA KATIBA LAISHAURI SERIKALI KUHUSU MCHAKATO WA KATIBA MPYA.
Jukwaa la Katiba Tanzania (JUKATA) imeishauri serikali kutoa taarifa rasmi kwenye gazeti la serikali kwamba mchakato wa katiba ni hai na utaendelea tena ili kupata katiba mpya.
Akizungumza na wandishi wa habari Jijini Dar es salaam, Mkurugenzi Mtendaji wa jukwaa hilo, Hebron Mwakahenda alisema kuwa katika bunge hili la April 2017, waziri husika apeleke miswada ya marekebisho ya sheria ili kurekebisha sheria zinazosimamia mchakato wa katiba mpya ikiwa ni pamoja na sheria ya kuanisha ni hatua gani za kupitia kifikia katiba mpya ikiwemo kuundwa chombo cha kusimamia mchakato wa katiba mpya
Aidha alisema kuwa ni vema serikali kabla ya kurekebisha sheria iwape fursa wananchi kujadili kwa kina ili kama taifa kukubaliana masuala ya msingi ya kuingizwa kwenye marekebisho na kuruhusu mijadala ya wazi juu yamaudhi ya katiba inayopendekezwa kwa sababu maudhui yake yamewagawa watanzania badala ya kuwaunganisha likiwa lengo la katiba ni kuwaunganisha watu na sio kujenga makundi ,chuki na uhasama pia busara kufikia muafaka wa kitaifa kwenye masuala msingi ya katiba kama vile haki za binadamu,muungano, maadili na miiko ya uongozi na usawa wa kijinsia.
Katika hatua nyingine Mwakahenda alisema kuwa wamesikitishwa na kitendo cha serikali kutotenga fedha tena kwa mwaka wa pili kwa ajili ya kukamilisha mchakato wa katiba na kuishauri serikali itenge fedha katika bajeti ya wizara mwaka wa fedha 2017/2018 ili kukamilisha mchakato wa katiba mpya kwa vile muda muafaka wa kumaliza uandishi wa katiba mpya ni kati ya mwaka 2017 na 2018 tofauti na hapo Upo uwezekano mkubwa katiba mpya ikapatikana baada ya mwaka 2020 hii ni kwa sababu 2019 na 2020 ni miaka ya yenye uchaguzi na uzoefu inaonyesha siyo rahisi kuandika katiba karibu na kipindi cha uchaguzi ama wakati wa uchaguzi.
