IMPALA FC WAIBUKA KIDEDEA KOMBE LA RUHINDA.

                                                            SERENGETI.

TIMU ya Impala ya Serengeti imetwaa ubingwa wa kombe Ruhinda lililokuwa lililofikia kilele chake juzi jumapili kwa kuitandika Kibeyo FC kukubali kichapo cha 1-0 kwenye fainali za kombe hilo zilizofanyika katika uwanja wa shule ya Msingi Matere mjini hapa.

Ligi hiyo iliyoanza june 6 ilifikia kilele chake juni 12 ikishirikisha timu sita ambazo ni Kibeyo, impala, Imara, Itununu, Wasanii na Park land.

Bao pekee la ubingwa la Impala FC lilifungwa na Tito James katika dakika ya 2 ya kipindi cha kwanza na kuwafanya Kibeyo FC kupoteza mwelekeo wa mchezo huo baada ya kuwahiwi na wapinzani wao.

Kocha wa Kibeyo FC Pius Kikondo ameiambia CLEO NEWS kuwa kufungwa katika dakika  ya pili kuliwafanya wachezaji wake kuchanganyikiwa na kushindwa kumudu mchezo huo ambapo walilazimika kuzuia ili wasiongezewe bao la pili jambo ambalo walifanikiwa huku wakishindwa kusawazisha.

“Makosa yalifanyika mapema tu tulipoanza mchezo na wapinzani wetu wakatumia mwanya huo kutufunga kutokana na wachezaji wangu wengi kuwa wageni wa soka hawajawahi kushiriki katika ligi kubwa ya timu sita kama hii,hata hivyo mchezo ndivyo ulivyo na matokeo yake ndivyo yalivyo usiposhinda unashindwa wewe” alisema Kikondo.

Kwa upande wake kocha wa Impala FC ya Matare, Lucas Pius alisema ushindi wao ulitokana na kuiandaa timu yake mapema baada ya kukabidhiwa kama kocha  mwaka jana mwezi wa nane na kusema lengo lake ni kuiweka katika kiwango kizuri cha kuipandisha kutoka daraja la nne hadi daraja la tatu  ngazi ya mkoa.

“Mazingira na uhaba wa vifaa ni moja ya changamoto zinazifanya timu nyingi kutofanya vizuri katika michuano mbalimbali, kuendesha timu kunahitaji pesa lakini nashukuru Impala FC kwa kuonyesha moyo wa kujituma hadi kufikia kuwa mabingwa wa kombe la Ruhinda na niwaahidi mashabiki wangu kuwa bado yapo mengi ya kuwafurahisha niliyowaandalia” alisema Pius.

Mratibu wa michuano hiyo, Daniel Solomon alisema kuwa mshindi wa kwanza alijinyakulia ngao, pesa taslimu sh, 50,000 na mbuzi beberu, huku mshindi wa pili akijitwalia cheti cha ushiriki na sh, 30,000 na mshindi wa tatu ambaye ni Itununu alipata sh, 20,000 na cheti.

“Kila timu iliyoshiriki imepata cheti, huku zawadi zingine zikiwa ni kwa mfungaji bora Emmanuel Amos amepata cheti, timu yenye nidhamu iliyoenda kwa  timu ya Wasanii  na golikipa bora Marwa Amos wa Impala FC amepata Cheti” alisema Solomon.