Amuua shemeji yake kwa kumchoma kisu begani wakigombana

Mkazi momoja wa Kitongoji cha  Nyabuchinchibu kijiji cha Kerende kata ya Kemambo Wilayani hapa mkoani Mara, Irabu Marwa (25) amefariki dunia baada ya kuchomwa kisu na sehemeji yake kwenye bega la kushoto.

Marwa alifariki dunia muda mfupi baada kupata jeraha hilo na kumsababishia kuvuja damu nyingi zilizomsababishia kufariki dunia kabala ya kufika hospitalini.

Kamanda wa polisi mkoa wa Tarime na Rorya Kamishina msaidizi Mwandamizi Henry Mwaibambe amethibitisha kutokea kwa tukio hilo lililotokea julai 26 saa 2 usiku katika kijiji cha Kerende kata ya Kemambo Wilayani hapa.

“Muuji ameoa mdogo wake marehemu, baada ya kutekeleza tukio hilo alikimbia kusikojulikana lakini jeshi la polisi linaendelea kuhakikisha kuwa anapatikana,”alisema SACP Mwaibambe.

Mwenyekiti wa kitongoji wa cha Nyabuchinchibu, Marc Marwa alisema tukio hilo lilitokea julai 26 majira ya saa mbili usiku wakati marehemu na shemeji yake walipokuwa wakinywa pombe.

Mwenyekiti wa kijiji cha Kerende  Mwita Magabe alisema kuwa alipata taarifa ya kutokea kwa tukio hilo kwa njia ya simu majira ya saa mbili usiku na alipofika karibu na eneo alithibitisha kuwa kweli Marwa alikuwa amefariki baada ya kuona mwili wake.

“Ninakoishi hakuna mawasiliano ya simu lakini jioni nikasema nisogee eneo la network ili nipate mawasiliano ndipo nilipata ujumbe mfupi kuwa kuna tukio la mtu kuuawa na nikaanza safari ya kuja kwenye eneo la tukio na kweli ndivyo ilivyokuwa,”alisema Magabe.

Hata hivyo Magabe alisema kuwa hilo ni tukio la pili kutokea katika kijiji chake la watu kuchomana kisu na kufariki  kwa muda wa  kipindi cha mwezi mmoja na tayari yameishakaa na kuweka mikakati ya jinsi ya kukomesha hali hiyo.

“Tumefanya mikutano miwili na kuweka faini ya sh, 200,000 kwa atakekutwa anatembea na panga au kisu, na kwa kushirikiana na wazee wa mila, lakini hili limetokea tena, tunaomba jeshi la polisi wanapomkamata mtu wa jinsi hii na kufikishwa mahakamani, mahakama isisubiri ushahidi,”alisema Magabe.

Marwa Magabe ambaye ni mdogo wake  Marehemu Irabu alisema kuwa marehemu alikuwa na ugomvi wa siku nyingi na shemeji yake hivyo walikuwa wakitoleana maneno na vitisho ya kufanyiana jambo lolote pale watakapokutana.

“Samwel Daudi (Aliyefanya mauaji) alitorosha mdogo wetu  hivyo Irabu akawa amekasirika kwa kitendo cha kumtorosha na kutuharibia sifa ya familia na mpaka sasa anaishi na mdogo wetu huyu, na marehemu ameacha mke na watoto watatu.

Changamoto sasa ni kwa shemeji jinsi ya kuwakuza watoto hawa watatu maana mkubwa ana miaka mitano wa pili mitatu na wa mwisho mmoja, kwetu hili ni pigo kubwa maana marehemu alikuwa tegemezi kwa familia,”alisema Magabe.