Waandishi wa MCL wang'ara maadhimisho ya siku ya vyombo vya habari mkoani Mara

Waandishi wa Mwananchi Communication limited inayochapisha magazeti ya Mwananchi, The Citizen na Mwanaspoti mkoani Mara wamekuwa mfano wa kuigwa kutokana na weledi wa kazi zao.

Sifa hizo zilitolewa mwishoni mwa wiki katika maadhimisho ya siku ya uhuru wa vyombo vya habari uliofanyika mkoani mara  mjini Musoma kwa kutajwa kuwa waandishi mahiri wa habari za uchunguzi na makala.

Waliotajwa kuwania mfano wa kuigwa ni Dinna Maningo, Antony Mayunga wa Mwananchi na Beldina Nyakeke wa the Citizen.

Akitoa salama za siku hiyo mkuu wa wilaya ya Musoma Dr. Vicent Aneyi alisema kuwa amekuwa akisoma kazi zao lakini hakuwahi kubahatika kuwaona.

"Leo ni siku njema kwa kuwafanya nimeona na  Dinna na Mayunga  ambao ni watu wa kawaida lakini wenye mawazo mapana,nimekuwa nikisoma habari zao lakini sikuwahi kuwaona ,wana mawazo chanya ambayo yanatakiwa kuigwa na waandishi wengine,"alisema Mkuu huyo wa Wilaya.

Awali mwenyekiti wa chama cha waandishi wa habari mkoani Mara  (MRPC) Mugini Jacob alisema kampuni ya Mwananchi imekuwa mfano wa kuigwa kwa waandishi wake kuandika habari za uchunguzi na kutwaa tuzo zinazotolewa na taasisi mbalimbali zinazojihusisha na habari ukiwemo mfuko wa kufadhili waandishi Tanzania (TMF).

"Tuna fursa za kugeukia habari za uwekezaji katika mkoa wetu ili tuweze kufanya wawekezaji kuona fursa zilizoko mkoa hapa waje kuwekeza, naamini kupitia kalamu zetu tunaweza kufanya sura ya mkoa wetu ukawa na matukio makubwa ya kiviwanda,"alisema Jacob ambaye ni mwandishi wa gazeti la serikali ya kiingereza Daily news.

Wakizungumza katika maadhimisho hayo waandishi wa Mwananchi Dinna Maningo na Antony Mayunga walisema ipo haja ya kufanya mabadiliko katika uandishi wa habari kuwa wa kitakwimu.

"Sasa ni wakati wa kuandika habari za kitakwimu (data journalism) na hii itatusaidia hata kuandaa maswali wakati wa kufanya mahojiano na !asali hayo yatakuelekeza ni nani anapaswa kuyajibu ili kupata takwimu hizo,'alisema Mayunga.

Aidha Maningo aliwataka waandishi mkoani Mara kufanya uandishi wa uchunguzi na kuachana na mialiko.

"Ukifanya habari za uchunguzi huwezi mlalamikiwa mkuu wa mkoa au wilaya kuwa hukualikwa kwenye kikao chake kwani utakuwa na kazi nyingi za kufanya ambazo zitakuwa heshima na wakati mwingine viongozi wa serikali watakuta taarifa ambazo wanazihitaji, nimekuwa mnufaika wa mfuko wa TMF tangu 2012 hadi mwaka 2016 ambao hulipwa kuanzia sh,milioni hadi sh, 4 milioni," alisema Maningo.

Siku ya uhuru wa vyombo vya habari Tanzania huungana na nchi nyingine dunia kuadhimisha kila mei 3, ambapo mkoa wa Mara kauli mbiu yake ilikuwa 'Sasa ni wakati wa habari za uwekezaji wa viwanda.