DC LUOGA ATAEKETEZA SHAMBA LA BANGI HEKARI SABA

MKUU WA WILAYA YA TARIME LUOGA AKIFYEKA SHAMBA LA BANGI

BANGI IKITEKETEZWA

Mkuu wa Wilaya ya Tarime Mkoani Mara Glorious Luoga kwa kushirikiana na kamati ya ulinzi ya wilaya hiyo walifyeka na kuteketeza kwa moto shamba la Bangi lenye ukubwa wa hekari saba katika mlima wa kijiji cha Weigita kata Kibasuka wilayani humo.

Akiteketeza mmea huo wa Bangi jana, Luoga alisema ni chanzo cha matumizi ya madawa ya kulevya kwa vijana ambao ndio nguvu kazi ya taifa na kwamba imechangia ongezeko la vichaa ambao huchanganyikiwa kwa kutumia bangi.

Luoga alisema miezi mitatu iliyopita waliteketeza bangi katika mlima huo shamba lenye hekari 23,ambapo jana walifyeka shamba lenye hekari saba,na kwamba zoezi hilo ni endelevu bila kikomo ili wakulima wa zao hilo waweze kubadilika na kuanza kulima mazao mengine ya biashara.

“Tumeendelea kuteketeza mashamba ya bangi leo hii tumeteketeza hekari saba. Matokeo chanya yameanza kuonekana kwa kuwa eneo tuliloteketeza leo mara ya mwisho tuliteketeza hekari 23 leo 7 maana yake wananchi wameanza kubadilika” alisema Luoga.

Luoga alisema wakulima wa zao hilo hulima katikati ya milima ambapo ni vigumu kubaini mmiliki halali wa shamba,ila kwa jitihada za jeshi la polisi wamiliki hubainika na huchukuliwa hatua mara tu baada ya kukamatwa.

“Mashamba hayo yapo juu ya mlima tunatembea umbali wa mita 8000 kufikia shamba hilo,na shamba sio moja,karibu milima yote iliyopo hapa wilayani,hivyo kila wiki tunaenda kukagua mlima mmoja baada ya mwingine”alisema Luoga.

Kwa upande wake mwenyekiti wa kijiji hicho Mnanka Nyaswi alikiri mlima wa kijiji chake kuwa na mashamba ya bangi ambapo alisema wamiliki wa mashamba hayo hutokea kijiji jirani cha Tagota kata ya Kenyamanyori.

Nyaswi alisema mashamba hayo ya bangi katika mlima huo yalianza tangu miaka ya1990,ambapo uongozi wa kijiji uliopita ulikuwa ukijaribu kuzungumza na viongozi wa kijiji hicho ili waweze kuweka katazo la kujishughulisha na kilimo hicho,lakini ilikuwa ikishindikana.

Alisema njia ya mkuu huyo wa wilaya ya kung’oa na kuchoma moto itasaidia kumaliza,kwa madai kuwa endapo atakosa kuvuna kwa muda wa miaka kadhaa,mkulima huyo ataweza kuacha kulima bangi.

Nae mkuu wa kituo cha polisi Mjini Tarime Thomas Mapuli alisema wahusika wa mashamba hayo watawasaka hadi watakapowakamata ili mkondo wa sheria uweze kuchukua mkondo wake.

…Mwisho…